लैंगिक उपचाराकडे कल

लैंगिक शिक्षणाचा अभाव असल्यामुळे त्यावर अनेक समज-गैरसमज आहेत. वयात येताना मुला-मुलींना योग्य मार्गदर्शन व शिक्षण मिळत नाही. त्यामुळे शाळा, महाविद्यालयात लैंगिक शिक्षण मिळणे आवश्यक आहे, असे मत वारंवार लैंगिक समस्या तज्ज्ञांकडून व्यक्त केले जाते. ज्या प्रमाणात शारीरिक आजारांकडे सजगतेने पाहिले जाते. त्या प्रमाणात लैंगिक आजार दुर्लक्षिले जातात. त्याचे गंभीर परिणाम भविष्यात दिसतात. नि:संकोचपणे लैंगिक समस्यावर उपचार न घेण्यामागे लैंगिक आरोग्य शिक्षणाचा अभाव असल्याचे निष्कर्ष समोर आले आहेत. सार्वजनिक स्वच्छतागृहात लावण्यात आलेल्या बोगस डॉक्टरांकडे उपचार घेऊन आर्थिक फसवणूक झालेले अनेकजण समाजाच्या भीतीने गप्प बसतात आणि त्यांचा आजारही बरा होत नाही. बहुतांशी लैंगिक समस्या लग्नानंतर काही दिवस किंवा त्यापूर्वी काही दिवस लक्षात येतात. या समस्येवर वेळीच उपचार न झाल्यास घटस्फोटापर्यंत जोडप्यांना सामोरे जावे लागते.

काय आहेत समस्या

समाजात लैंगिक समस्यांबाबत अनेक गैरसमज आहेत. पुरुषांत लैंगिक दुर्बलता, शीघ्रपतन, लैंगिक इच्छा नसणे, स्त्रियांत लैंगिक संवेदना नसणे, वेदनादायी समागम, हस्तमैथुन, स्वप्नदोष, लिंगाचा आकार लहान असणे अशा समस्या आढळतात.

काय आहेत कारणे

बहुतांश लैंगिक समस्यांमागे नैराश्य, राग, थकवा अशी मानसिक कारणे आढळतात. तर संप्रेरकाची कमतरता, लैंगिक अवयवांचे आजार, मधुमेह, उच्च रक्तदाब, हृदयरोग, वेदनाशामक व तणाव कमी करणाऱ्या गोळ्यांचे सततचे सेवन ही मुख्यतः कारणे आहेत.

काय कराल

लैंगिक समस्या उपचार व समुपदेशनाने बऱ्या होतात. समुपदेशनात शरीर रचना, लैंगिक क्रिया याबाबत शास्त्रीय माहिती दिली जाते. समस्येवर उपचार घेताना अधिकृत डॉक्टरांचा सल्ला घ्यावा. जाहिराती पाहून भोंदू डॉक्टरांकडे जाऊ नये. परस्पर औषधे घेणे टाळावे व्हायग्रासारखी औषधे उपाय म्हणून घेऊ नयेत. आजार दीर्घकाळ रेंगाळत ठेवू नयेत, असे डॉ. सावंत यांनी सुचवले आहे.

म्हणून प्रश्न सुटणार नाही...

लैंगिक हिंसाचाराला आळा घालण्यासाठी पॉर्न साइटवर बंदी घालण्याचा निर्णय सरकारकडून घेण्यात आला होता. मात्र, अनेक वेबसाइट तांत्रिक बदल करून पूर्ववत सुरू झाल्या आहेत. पॉर्न संकेतस्थळावर बंदी घालून प्रश्न सुटणार नाहीत. तर त्यासाठी शालेय स्तरावर लैंगिक शिक्षणाद्वारे मुलांच्या मनातील कुतूहल शमवावे लागेल. वेळीच मुलांना मार्गदर्शन मिळाल्यास ते चुकीच्या गोष्टींकडे वळणार नाहीत, असे मत अभ्यासकांनी व्यक्त केले आहे.

जागतिक लैंगिक आरोग्य दिवसाची थीम 'सर्वांसाठी लैंगिक आरोग्य' ही आहे. मुख्यत: लैंगिक शिक्षण हे लैंगिक संबंधांचे शिक्षण नसते. वाढत्या वयाबरोबर शारिरीक व मानसिक बदलांना आत्मविश्वासाने सामोरे जाण्याचे ते शिक्षण असते. त्यामुळे या विषयाचा अभ्यासक्रमात समावेश असावा. हे आजार बरे होणारे असतात. मात्र त्यासाठी डॉक्टर निवडताना काळजी घ्यावी.

डॉ. राजसिंह सावंत, सल्लागार, लैंगिक उपचारतज्ज्

Original Article : लैंगिक उपचाराकडे कल - Maharashtra Times - 4 Sep 2019